उद्धव सेनेचे नेते सुधाकर बडगुजर भाजपमध्ये प्रवेशासाठी मुंबईकडे कूच केली आहे. भाजपमध्ये त्यांचा प्रवेश निश्चित मानण्यात येत आहे. अर्थात स्थानिक भाजपा पदाधिकाऱ्यांनी त्यांच्या प्रवेशाला कडाडून विरोध केला आहे. तर दुसरीकडे आता शिंदे (Eknath Shinde) गटाने सुद्धा उद्धव ठाकरे सेनेला सुरूंग लावला आहे. नाशिकचे एकूण चार माजी नगरसेवक आज शिंदे गटात प्रवेश केला आहे. आज उपमुख्यमंत्री एकनाथ शिंदे यांच्या उपस्थितीत या चौघांनी शिंदे सेनेत प्रवेश केला. त्यांनी आगामी महानगरपालिका निवडणुकीत चारही जागा निवडून आणण्याचा दावा केला. या घडामोडींमुळे उद्धव सेनेला मोठा धक्का बसला आहे.
उद्धव सेनेला नाशकात एकामागोमाग धक्के बसत आहेत. माजी मंत्री बबनराव घोलप, त्यानंतर आता सुधाकर बडगुजर यांनी उद्धव ठाकरे (Uddhav Thackeray) शिवसेनेला जय महाराष्ट्र केला. त्यानंतर आता चार नगरसेवकांनी सुद्धा अखेरचा निरोप दिला. किरण दराडे, सीमा निगळ, पुंडलिक अरिंगळे, पुंजाराम गामने यांनी आज शिवबंधन सोडून शिंदे गटात प्रवेश केला. उपमुख्यमंत्री एकनाथ शिंदे यांच्या उपस्थितीत हे चारही नगरसेवक शिंदे गटात दाखल झाले.
ठाकरे गटातील आऊट गोईंग सुरू आहे. नाशिकवर मध्यंतरी ठाकरे सेनेने लक्ष केंद्रीत केले होते. येथील बंडाळी मोडून काढण्यासाठी समन्वयाचा पूल बांधण्याचे काम केले होते. पण त्याचा फारसा उपयोग झाल्याचे दिसून येत नाही. नेते, पदाधिकारी आणि कार्यकर्त्यांचा भाजपा, शिंदे सेनेकडे ओढा वाढला आहे. या गळतीमुळे ठाकरे सेनेचे स्थानिक स्वराज्य संस्थांच्या निवडणुकीतील ताकद कमी झाल्याचा दावा करण्यात येत आहे.
