सध्या परीक्षेचा काळ सुरू आहे, त्यामुळे बरेच विद्यार्थी लक्ष केंद्रित करण्यासाठी आणि एकाग्रता वाढवण्यासाठी एनर्जी ड्रिंकचा वापर करतात. जिममध्ये जाणारे तरुण तर सर्रासपणे एनर्जी ड्रिंकचे कॅन पिताना दिसतात. परंतु, सतत एनर्जी ड्रिंक (Energy Drink) पिण्याच्या सवयीने शरीरात कॅलरीजचे प्रमाण वाढते आणि ही सवय नंतर व्यसनात बदलते. अशाने तरुणांच्या शरीरावर प्रतिकूल परिणाम होतो.
या विषयावर मोहालीमधील फोर्टिस हॉस्पिटलमधील इंटरनल मेडिसिनचे डायरेक्टर डॉ. विकास भुतानी यांनी द इंडियन एक्स्प्रेसशी बोलताना सविस्तर माहिती दिली आहे. डॉ. विकास भुतानी म्हणाले की, किशोरवयीन तरुण आणि खेळाडूंमध्ये एनर्जी ड्रिंक्सचे सेवन करण्याचे प्रमाण वाढले आहे. एनर्जी ड्रिंक्समध्ये कॅफिन, साखरेसह त्यात ग्वाराना, टॉरिन व जिनसेंग यांसारखे उत्तेजक घटक असतात. याच्या सेवनाने सतर्कता, लक्ष केंद्रित करण्याची क्षमता आणि ऊर्जेची पातळी वाढवते, परंतु त्याचबरोबर रक्तदाब, हृदयविकार आणि श्वासोच्छ्वासासंबंधित त्रासदेखील वाढतात.
डॉ. भुतानी पुढे सांगतात की, एनर्जी ड्रिंक्समध्ये साखरेचे प्रमाण अधिक असल्याने शरीरात इन्सुलिन सेंसिटिव्हिटी आणि रक्तातील साखरेचे प्रमाणही वाढते. जरी एनर्जी ड्रिंक्स व्यायामापूर्वी किंवा नंतर, खेळण्याआधी किंवा नंतर पिण्यास लोकांची पसंती असेल तरी त्यातील अतिरिक्त साखरेच्या प्रमाणामुळे कालांतराने शरीरात जास्त कॅलरीज जमा होऊ शकतात. यामुळे वजन वाढते, इन्सुलिन सेंसिटिव्हिटी जाणवते, संप्रेरकांचे कार्य बिघडते, अशी माहिती पंचकुला येथील अल्केमिस्ट हॉस्पिटलमधील इंटरव्हेंशनल कार्डिओलॉजीचे सल्लागार डॉ. सुधांशू बुडाकोटी यांनी दिली.
याशिवाय एनर्जी ड्रिंक्समधील कृत्रिम गोड घटकामुळे खाण्याची लालसा वाढू शकते. यामुळे कदाचित तृप्तता जाणवत नाही, त्यामुळे एनर्जी ड्रिंक्सच्या माध्यमातून लोक जास्त कॅलरीजचे सेवन करतात, पण तरीही पोट भरल्यासारखे वाटत नाही. मुलांना लहानपणापासूनच अशा पेयांची सवय लावली जाते, त्यामुळे काही काळानंतर त्यांचे वजन वाढते आणि लठ्ठपणा येतो,” असे चंदीगड येथील पीजीआयएमईआर, कार्डिओलॉजी विभागाचे अतिरिक्त प्राध्यापक डॉ. पराग बारवाड सांगतात.
