झिगाना गन, 25 लाखांचा करार; बिश्णोई गँगने कसा आखला
अभिनेता सलमान खानच्या हत्येचा कट रचण्याबद्दल एक मोठा खुलासा झाला आहे. लॉरेन्स बिष्णोई गँगने दिवंगत पंजाबी गायक सिद्धू मूसेवालाप्रमाणेच सलमानची गोळ्या झाडून हत्या करण्याचा प्लॅन केला होता. याबद्दल महाराष्ट्राच्या पनवेल पोलिसांकडून दाखल करण्यात आलेल्या चार्जशीटमध्ये धक्कादायक खुलासा करण्यात आला आहे. सलमानच्या हत्येच्या प्लॅनिंगमध्ये पाकिस्तानचंही कनेक्शन समोर आलं आहे. पोलिसांनी त्यांच्या गोपनीय तपासात संशयितांच्या मोबाइल फोन टॉवरच्या लोकेशनची माहिती मिळवून हे विश्लेषण सादर केलंय. पनवेल पोलिसांकडून दाखल करण्यात आलेल्या चार्जशीटमध्ये म्हटलंय की लॉरेन्स बिष्णोई गँग ही एके-47 सह पाकिस्तानमधून इतर शस्त्रे मागवून सलमानची हत्या करण्याची योजना आखत होती. सलमानवर हा कथित हल्ला चित्रपटाच्या शूटिंगसाठी तो पनवेल फार्महाऊसमधून बाहेर पडताना केला जाणार होता, असंही त्यात म्हटलंय.
पोलिसांनी याप्रकरणी 350 पानांचा आरोपपत्र दाखल केला आहे. यामध्ये लॉरेन्स बिष्णोई गँगच्या पाच लोकांचा उल्लेख करण्यात आला आहे. त्यात अजय कश्यप, गौतम भाटिया, वास्पी महमूद खान, रिझवान हसन, दीपक हवा सिंह यांचा समावेश आहे. एप्रिल महिन्यात पनवेल पोलीस इन्स्पेक्टर नितीन ठाकरे यांना सलमानवरील हल्ल्याची माहिती गोपनीय सूत्रांकडून मिळाली होती. लॉरेन्स बिष्णोईनेच सलमानवर हल्ला करण्यासाठी गँगला 25 लाख रुपयांची सुपारी दिल्याचं नंतर तपासात उघड झालं होतं.
